ཁེ་ལས་པ།

གཞོན་ནུའི་སེམས་སྐུལ་གློག་བརྙན་ཐུང་ངུ།

གློག་བརྙན《ཏཱ་ནི་སྟོད་ཀྱི་ནམ་མཁའ》ནི་དམངས་ཁྲོད་གཏམ་རྒྱུད《ཉི་མ་ཚེ་རིང་དང་ཟླ་བཟང་སྒྲོལ་མ》གཞིར་བྱས་ནས་བཅོས་སྒྲིག་བྱས་པའི་གློག་བརྙན་ཞིག་གོ།།

དེང་སང་སྤྱི་ཚོགས་ཐོག་ཕ་མས་བུ་ཕྲུག་གི་མ་འོངས་པར་ཚད་མཐོ་དྲག་པའི་རེ་འདུན་བཅངས་ནས་རྙིང་ཞེན་ཆེ་བའི་བསམ་བློའི་འདུ་ཤེས་ཀྱིས་བུ་ཕྲུག་གི་འོད་སྟོང་ལྡན་པའི་མ་འོངས་པ་དེ་བཀག་སྡོམ་གྱི་རྒྱ་རུ་བཙུད་པའམ་ཡང་ན་ལྕགས་ཕོར་རུ་ཁོ་ནའི་ཕྱོགས་སུ་བཙན་ཁྲིད་བྱེད་པ་དེ་ནི་ཕ་མས་དུས་རབས་གསར་པའི་ན་གཞོན་ལ་ཆ་རྒྱུས་ཀྱིས་མ་འདང་པ་དང་། རྒྱལ་ཁབ་ཀྱིས་གཞོན་རབས་པའི་ཁེ་ལས་ལ་རོགས་སྐྱོར་གྱི་སྲིད་ཇུས་བཟང་པོ་དེ་མ་ཤེས་པ་མ་ཚད།ཕུགས་བསམ་དང་དངོས་ཡོད་ཀྱི་ཁྱད་པར་མ་ཤེས་པའི་སྐྱོན་ཆ་ཡིན་པ་སྨོས་ཅི་དགོས།བགྲང་ལས་འདས་པའི་མཐར་ཕྱིན་སློབ་མ་ཚོ་སྤྱི་ཚོགས་ཀྱི་འགྲན་རྩོད་ཆེ་དྲག་པའི་དབང་གིས་ལས་དོན་མི་རག་པ་དང་ཁྱིམ་ཚང་གི་བསམ་བློའི་འདུ་ཤེས་ཨུ་ཚུགས་ཆེ་སོང་བས་རང་ཉིད་ཀྱི་བསམ་ཚུལ་དང་འདོད་མོས་ལ་བསམ་ཤེས་བྱེད་མཁན་ཉུང་རྐྱེན།ལས་རིགས་གཞན་དག་ལ་ཚོད་ལྟ་དང་འཕེལ་རྒྱས་གཏོང་བའི་ཐབས་ཤེས་མེད་པར་གྱུར་སོང་། དེའི་ཕྱིར་བརྙན་ཐུང་འདིའི་ནང་ཕ་མས་བུ་ཕྲུག་གི་བསམ་བློ་དང་གདམ་ཀ་ལ་བརྩི་འཇོག་བྱེད་པར་གལ་ཆེན་ཡིན་པ་དང་།རྒྱལ་ཁབ་ཀྱི་སྲིད་ཇུས་བཟང་པོ་དེ་ལ་རྒྱུས་ལོན་དང་ཡིད་ཆེས་བྱེད་པ། ཕ་མས་སྤྱི་ཚོགས་ཀྱི་ཁ་ཕྱོགས་ལ་དོ་སྣང་བྱེད་པ། བུ་ཕྲུག་གིས་གདམ་པའི་ལམ་བུ་དེར་གཟེངས་བསྟོད་དང་རྒྱབ་སྐྱོར་བྱས་ནས་བུ་ཕྲུག་ལ་དབང་བའི་ནུས་རྩལ་ཞིག་སྐྱེད་སྲིང་བྱེད་དགོས་པའི་སྐུལ་མ་གཏོང་ཡོད།

འདི་རང་མི་རིགས་ཀྱི་སྐད་ཡིག་དང་སྒྱུ་རྩལ་གྱི་རྣམ་པའི་ཐོག་ནས་རང་རིགས་ལ་འཚོ་བའི་ཐོག་སློབ་གསོ་ཆུང་ཆུང་ཞིག་ཐོན་རྒྱུའི་ཁུལ་ཡིན་ལ་ལྷན་རྒྱས་ནས་རྒྱབ་སྐྱོར་དང་བརྒྱུད་བསྐུར་གནང་རྒྱུར་འདུན་པ་ཤིན་ཏུ་ནས་ཆེ་ལ་ལྷན་རྒྱས་ཕྱོགས་ཐུགས་རེ་གསོལ་བའི་སྨོན་འདུན་ཞུ་རྒྱུ་ཡིན།